ڈیرہ غازی خان:
ڈیرہ غازی خان میں نامعلوم افراد ایک نوزائیدہ بچے کو مقامی مسجد میں چھوڑ کر چلے گئے، جسے بعد ازاں حکام نے تحویل میں لے کر محفوظ مقام پر منتقل کر دیا۔
تفصیلات کے مطابق Punjab Child Protection and Welfare Bureau نے مقامی مسجد سے لاوارث حالت میں ملنے والے نومولود بچے کو اپنی تحویل میں لے لیا۔ اطلاع ملنے پر بیورو کی ریسکیو ٹیم نے فوری کارروائی کرتے ہوئے بچے کو محفوظ مقام پر منتقل کیا۔
چیئرپرسن چائلڈ پروٹیکشن بیورو اور رکن صوبائی اسمبلی Sarah Ahmad کے مطابق بچے کو فوری طور پر طبی معائنے کے لیے اسپتال منتقل کیا گیا تاکہ اس کی صحت کا مکمل جائزہ لیا جا سکے۔
انہوں نے بتایا کہ بچے کو بیورو کے انفینٹ کیئر یونٹ میں رکھا گیا ہے جہاں تربیت یافتہ عملہ چوبیس گھنٹے اس کی دیکھ بھال کر رہا ہے اور اسے تمام ضروری طبی اور حفاظتی سہولیات فراہم کی جا رہی ہیں۔
سارہ احمد کا کہنا تھا کہ قانونی تقاضے مکمل ہونے کے بعد ایسے بچوں کو شفاف طریقہ کار کے تحت اہل اور مستحق خاندانوں کو گود دینے کے عمل کو بھی تیز کیا جا رہا ہے۔
انہوں نے شہریوں سے اپیل کی کہ اگر کہیں کوئی لاوارث یا تشدد کا شکار بچہ نظر آئے تو فوری طور پر چائلڈ پروٹیکشن بیورو کی ہیلپ لائن 1121 پر اطلاع دیں تاکہ بروقت کارروائی ممکن ہو سکے
